आपण सर्वजण आपल्याघरी वेगवेगळी धर्मिक कार्ये करतो. यामध्ये यजमानांना उपयुक्त माहिती देण्याचा प्रामाणिक प्रयत्न केलेला आहे. बर्‍याचवेळेला आलेल्या गुरूजींना करत असलेल्या कर्माबद्दल सविस्तरपणे माहिती सांगणे जमत नाही. अर्थात यामधे त्यांचा फ़ार दोष आहे असे मला वाटत नाही कारण- तस्मात् शास्त्रं प्रमाणंते कार्या कार्यौव्यवस्थितौ । गीता

शास्त्राला अनुसरून जास्तीत जास्त प्रमाणबद्ध कार्य करणे हे त्यांचे प्रमुख काम असते.

मग यजमानांच्या प्रश्नांचे काय ?

कार्य करणारा यजमान, पुरोहित व कार्याचा उद्देश या तीन गोष्टिंशिवाय कर्माची सिद्धी नाही. त्यामुळे यजमानांनी हे समजून घेणे आवश्यक आहे.

एक लक्षात घ्यावे की, कोणतेही कर्म श्रद्धेवाचून करू नये.

कारण- अश्रद्धया हुतं, दत्तं तपस्तप्तं कृतं च यत् । असदित्युच्यते पार्थ न च तत्प्रेत्यनो इह । गीता

अश्रद्धेने केलेले हवन, दिलेलेदान, केलेली तपश्चर्या अन्य काहिही जर श्रद्धानसेल तर कहिच फ़ायदा नाही असे भगवंतानी सांगुन ठेवले आहे. म्हणुनच कोणतेही कार्य पूर्ण श्रद्धेने करावे. या जगामध्ये जो विधाता, परमेश्वर आहे, तोच या सृष्टीचे नियमन करतो, आपले जिवनही तोच चालवतो. आपल्या पूर्वकर्मानुसार व या जन्माच्या कर्मानुसार आपल्या सर्वांना सुखदु:खांना सामोरे जावेच लागते. या देहाला जेव्हा वेगवेगळ्या अनुभूति येतात, त्यात काही गोष्टी अनुकूल तर काही प्रतिकूल अशा घटनांमुळेमुळे आपण संचित होतो. आणि त्याचवेळी आपल्याला कोणातरी आधार हवा असतो. तो अनादि काळापासून चालत आलेल्या या कर्मकाण्डामधे मिळतो.

ज्या गोष्टी करण्यात आपल्याला समाधान मिळते, उदा. गणपति पूजेला जास्वंदाचे फूल लागते. दूर्वा लागतात त्या मिळवण्याचा आपण प्रयत्न करतो, त्यावेळी थोडे-फार कष्ट होतात. अर्थात कष्ट नाहीत तर फळ कोठून मिळणार. तेव्हा कष्ट आनंदाने स्विकारले तरच त्यात आनंद मिळतो. अन्यथा मेहनत वाया जाते.

कर्मकाण्डामध्ये परमेश्वराची भक्ति, परमेश्वराची आळवणी, ईश्वराला काही अर्पण करून संतुष्ट करणे, त्याच्याबद्दल कृतज्ञता व्यक्त करणे इ. गोष्टींचा समावेश आहे. आपल्या जिवनामध्ये वैयक्तिक सुखद:खानुसार खूप गोष्टी करतो. काहीवेळा आपले वरिष्ठ आपल्यावर नाराज होतात, त्यावेळी ते संतुष्ट होण्यासाठी काहीही करावे लागते. वेळप्रसंगी केलेला अपमान सहन करावा लागतो, त्याची स्तुती करावी लागते, प्रसंगी त्यांनी घेतलेल्या अयोग्य निर्णयाला सहमती दाखवावी लागते. मग आपल्या पहिल्या श्वासाबरोबर आपल्या हृदयात वास करणा‍र्‍या प्रभूच्या नियमांचे उल्लंघन केल्यावर मिळणार्‍या शिक्षेत (आपले कर्मभोग ) सुट मिळावी अथवा शिक्षा भोगण्याचे सामर्थ्य मिळावे म्हणून जर भगवंतांची स्तुती केली, किंवा पूजन अर्चन केले तर काय बिघडते ?

तेव्हा शास्त्रमार्गात काही विधी सांगितले आहेत किंवा अन्य काही गोष्टी सांगितल्या आहेत त्या पूर्ण श्रद्धेनेच कराव्यात यातच आपले हीत आहे. आता कर्मकाण्डात येणार्‍या काही गोष्टिंची माहिती करून घेऊ.

यामधे जास्तीत जास्त माहिती देण्याचा प्रयत्न केला आहे. परंतु, आपल्याला आणखी कोणत्या विषयाची माहिती हवी असल्यास संपर्क करावा. शक्य तेवढी माहिती उपलब्ध करून दिली जाईल.

॥ शुभं भवतु ॥